طاح الجبل...

#1 (**permalink**) 07-Jul-2008, 06:20 AM

السلام عليكم ورحمة الله وبركاته ...

صباح الخيرات...

هذي عبارة عن أبيات متواضعة كتبتها ولد خالي

في جدي رحمه الله رحمةً واسعة وأسكنه فسيح جناته والذي توفي في يوم الخميس ليلة الجمعة في تمام الساعة العاشرة والعشرين دقيقة ليلاً في تاريخ 19/3/1429هـ .
وعنوانها بـ ..
(( طاح الجبل ))

أكتب بدمعي حروف القصيد،،
وأسترسل العبرات وأنحب نحيب..
للي رحيله غصب عن ما نريد،،
رحيل مر وللب الفؤاد يصيب..
رحيل كل ما ذكرته دموعي تزيد،،
وعيوني من البكاء ما يداويها طبيب..
انسميت وحالي يصعب على كل صنديد،،
بكيت لحد ما صار الدمع لبكاي ما يستجيب..
وتبدل الدمع بدم وزيادة صديد،،
وعيوني تورمت بشكل موحش ورهيب..
كل ما ذكر ما صار بيوم العيد،،
عيد الأضحى طاح فيه جدي صويب..
طاح الجبل وانكسر بين رجل وايد،،
ما يقوى يشيل عظامه والجسد ما يستجيب..
ثلاث شهور على ظهره رقيد،،
ما يقوم وصابر وبصبره غريب..
محتسب الأجر لرب العبيد،،
ما يشكي وعن صلاته فكره مايغيب..
يذكر ربه ويدينه بالخير تجيد،،
ما يتوانى لحظة ولا لأحد يعيب..
وإذا زادوا ضيوفه يكون سعيد،،
ما يمل من لفاه ولو هو غريب..
راعي الكرم وبيته بالعلم مشيد،،
والكل ينصاه البعيد قبل القريب..
ينصر المظلوم ويكون حازم وشديد،،
ما ينثني والحق لصاحبه لازم يجيب..
بليغ حجه وله الرأي السديد،،
ينظر للأمور بشكل عجيب..
وبالمواقف الصعبة ما يحتار أو يحيد،،
حكيم راي وبالشدايد موقف صليب..
راعي تجارب ويعطي علم مفيد،،
ليا طلبت منه الحاجة تلقى ترحيب،،
وطريق الخير له خير شهيد،،
هذا غير مساهمته بالمواجيب..
هذي بعض علومه والخافي عتيد،،
يعمل الخير ويطلب من الله يستجيب..
تدهور حاله ولا ندري باللي يريد،،
يعجز لسانه عن النطق ونحتار بما نجيب،،
دخل المستشفى والأجهزة عليه تزيد،،
والوكاد إنه عن وعيه بدا يغيب..
شي على قلبه وعلى الراس وبالوريد،،
وصوت وناتها يخوف ومهيب..
نزوره ونبكي وندعي المجيب،،
ملتفين حوله والأجهزة شكلها مريب..
أربع ليالي على ذا الحال الشديد،،
والوضع متأزم وعنده كل طبيب..
وفي ليلة الجمعة الساعة عشر بالتحديد،،
جانا اتصال برنة كلها ترهيب..
والكل سكت ينتظر خبر أكيد،،
طالعت أنا عمي ووجهه صويب..
ناداني وقلت الخبر وش الجديد،،
قالي إلبس وتعال أمر رهيب..
دخلت المجلس وقالوا عطنا المفيد،،
قلت الوضع ما يطمن عن الحبيب..
لحقته أبي العلم وصفق ايد بايد،،
راح أبوي راح .. راح راعي الطيب..
انصدمت ما صدقت وصار فكري شريد،،
أبوي مات .. لا.. لا أكيد أكاذيب..
وبعدها بلحظات للوضع بديت استعيد،،
لا حول ولا قوة إلا بالله المنيب..
حمدت الله واسترجعت ومسكته وحيد،،
وبعدها جو إخواني وزاد النحيب..
الكل بكى وصاح دون تقييد،،
وانطلقنا للمستشفى دون تحسيب..
طلبنا نشوفه بكل إلحاح وتأكيد،،
طلعنا بين عم وأخ وقريب ونسيب..
شفناه وهو على سريره مديد،،
ناديته .. يبه .. يبه ولندانا مايجيب..
فالين فوقه شرشف أبيض جديد،،
مغطيه كله ويمه ممرض وطبيب..
عزونا بأبوي النادر الحر الفريد،،
اللي رحل عنا وارتاح من التعذيب..
طالعنا وجهه فيه نور شديد،،
وكنه في لذيذ نومه يغيب..
بدا البكاء وكل ما له يعلى ويزيد،،
وصار كل واحد في حاله صويب..
كتمنا العبرات بين وعد ووعيد،،
ما نبي الخبر يوصل وتزود التكاريب..
اجتمعنا وكل بدا برايه يشيد،،
الخبر لازم يطلع بس وش الترتيب..
اتفقنا وطلعنا بشور مفيد،،
ودخلنا والأنظار مصوبة تصويب..
وزاد خوفنا وترددنا ترديد،،
وتكلم كبيرنا بكل هدوء وتهذيب..
خالة أبوي تعبه زاد ثم بدا يعيد،،
التعب زاد .. زاد هذا كلام الطبيب..
تداركته وقالت هذا علم جديد،،
إلا قل مات .. وبنعم هو لها مجيب..
التفوا الأهل حولنا بشكل شديد،،
وش العلم وبدا صوت البكاء والنحيب..
قلت أبوي مات خبر أكيد،،
مات .. مات .. مات الفطن اللبيب..
وانتشر الخبر للقريب والبعيد،،
و التموا كلهم بليل مظلم وكئيب..
ترحموا عليه يا أهلي هو الحين فقيد،،
فيهم من بكى ومن طاح عن وعيه يغيب..
لوعة ما بعدها لوعة على القلب تزيد،،
والحزن في روحي يتقلب تقليب..
ملازمني وكنه معي وليد،،
ما يفارقني لحظة ولا يسيب..
له نار مثل بركان وقيد،،
تحرق ما حولها بس من اللهيب..
هذا فيصل له أيام في قبره رقيد،،
من يوم الأحد وقلبي توه صويب..
وخميس بعده الحزن لنفسه يعيد،،
خبر هوله أشعل الراس شيب..
رحل جدي عنا رحيل والله نكيد،،
بردت حرته كل حرة يوجسها القليب..
يا أهلي ارحموني هذا حالي شديد،،
اصبروا شوفوا حزني صعيب..
ما رقدنا وبدينا بيوم جديد،،
طلعت شمسه وبدينا بالترتيب..
وبيوم الجمعة اللي للمسلمين عيد،،
بالمغسلة بكانا يظهر مرة ويغيب..
فلينا لفته ومن ثيابه جريد،،
غسلناه والماء من فوقه صبيب..
وإصبعه يشير لنطقه كلمة التوحيد،،
بارز بين أصابع الوالد الحبيب..
نقلناه للكفن تشاركنا وكل بايد،،
وطيبناه بالمسك والعود وأجود طيب..
لفيناه بالكفن وربطناه بتجويد،،
وفوق النعش حطيناه بتأديب..
جو الأهل لوداع شيخ الأجاويد،،
بكت المدامع بكل حرقة ولواهيب..
بعدها ضميته على صدري وحيد،،
ما حولي أحد ودمعي سكيب..
نقلناه للمسجد بين عبرة وتنهيد،،
جلسنا ندعي وننتظر الخطيب..
صلينا الجمعة وبدت الدموع تزيد،،
لحظة الوداع قربت والوقت العصيب..
وصلينا عليه والكل لشيله يريد،،
رفعناه بسرعة وحطيناه فوق المناكيب..
وصلنا للمقبرة بالحزن العتيد،،
نزلت لقبره والقلب عطيب..
شلناه ونزلناه وأحكمنا التلحيد،،
وصفينا اللبن فوقه بترتيب..
سالت دموع العين دون ما تريد،،
وأنا واقف أشوفه تحت التراب يغيب..
يارب رحماك ياخالق العبيد،،
وتثبت أبوي بالقول الصويب..
ووسع قبره يا حميد يا مجيد،،
واجعله من رياض الجنة يا مجيب..
تحول دمعي لدم القلب والوريد،،
ينزل وأنا واقف للعزاء والتوجيب..
أدعي له الله بالمغفرة وأكثر التحميد،،
والبقاء للواحد سبحانه الرحمن المنيب..
ومن بعدك يا أبوي صرت مثل الشريد،،
اللي ضامته الدنيا ويدورونه أهل المطاليب..
من رحلت يا أبوي وأنا ضايع ووحيد،،
ما كن لي بالدنيا لا حبيب أو قريب..
والله لو البكاء والدمع بيفيد،،
لأسيل بالدموع كل وادي وشعيب..
لأجل أشوفك أو أقبل راسك والايد،،
وأحضنك يا أبوي يا راعي الطيب..
أو أجلس معك ساعة ماتزيد،،
وأسولف معك يا ذيب يا ابن ذيب..
والله لو لا خوفي من العذاب الشديد،،
لأسوي سوايا الجاهلية وأشق الجيب..
رجعنا للبيت بهالوضع النكيد،،
بين بكاء وألم وصوت النحيب..
عمري ما حسيت لحظة باليتم أو إني وحيد،،
ستة وعشرين عام وأنا بكل عزة وتطريب..
من رحيل أبوي وهو بحنانه يجيد،،
ما ابتعد عنا ومن دون ما نطلب يجيب..
ومن رحل جدي صار يتمي أكيد،،
حسيت بمرارته وبألمه وحزنه اللهيب..
جدي ياللي ما تعرفونه هاكم المفيد،،
هو(( عبدالله بن محمد العبدالله ال.....))
بعدها رجعت المقبرة ولقبره بالتحديد،،
بكيت عنده وقبلت ترابه والمناصيب..
أدعي الله يرحمه ويصبرنا على الفقيد،،
بآخر نهار الجمعة وقبل ما شمسه تغيب..
يارب تجعله جار النبي وكل شهيد،،
بالفردوس الأعلى إنك سميع مجيب..
وختمامها صلوا على النبي يحيد،،
خاتم رسل الله ورسالاته ترتيب..

وسلامتكم

07-Jul-2008, 06:36 AM

رحم الله فقيدك الغالي واسكنه فسيح جناته

قصيده جميله جدا ورائعه وابيات من القلب لا من القلم

تعبير حزين وتسلسل رائع في روايه الفقيد ( رحمه الله تعالى)

واعجبني

يذكر ربه ويدينه بالخير تجيد،،
ما يتوانى لحظة ولا لأحد يعيب..
وإذا زادوا ضيوفه يكون سعيد،،
ما يمل من لفاه ولو هو غريب..
راعي الكرم وبيته بالعلم مشيد،،
والكل ينصاه البعيد قبل القريب..

والخاتمه اروع وهي الواجبه علينا ( الدعاء له بالمغفره)

أدعي الله يرحمه ويصبرنا على الفقيد،،
بآخر نهار الجمعة وقبل ما شمسه تغيب..
يارب تجعله جار النبي وكل شهيد،،
بالفردوس الأعلى إنك سميع مجيب..
وختمامها صلوا على النبي يحيد،،
خاتم رسل الله ورسالاته ترتيب..

اللهم صلي وبارك على محمد وعلى من تبعهم بأحسان الى يوم الدين

تسلمين لنا مزاجيه وصح لسانك ولسان قايلها

وتقبلي مروري