لي كلمة(ن) لو قلتها تغني عن بحور الكلام
تغني الفقير وتكرمه دامه توصّف بالمقال
(المرجله) عز وفخر ماهي بكلمه والسلام
لي فرقّت بين الرجال وبين ذريات الرمال
راعي المعاني فالعرب له بالفخر اعلى مقام
واللي عديم(ن) مذهبه ماينفعه جاه(ن) ومال
بسألْك ياراعي الغنى وش فايدة مال الحرام
مالك وجاهك والغنى كلّه معرّض للزّوال
الفلوس ما تشري الطبع والحلم ذا صعب المرام
وان كنت تحلم بالسنع ابشر ترى حلمك خيال
خذها ف بالك حكمة(ن) ما ينشرى طبع الكرام
ولا يندعي طير(ن) بلا تلواح(ن) يجيبه محال
من عاشر أطباع الردّى ما عاش له طبعه ودام
مات الشعور بخافق(ن) قاصر عمر لو فيه طال
حامض يقول انّ العنب لي ماقدر قَطْـفه ورام
دايم يذم الي يشوفه مبعد وصعب المنال
الشيخ شيخ بهيبته لا من قعد أو يوم قام
والمرجله ما هي لحى من فوقها غتره وشال
واللي رفيع(ن) منزله مفنود من بين الانام
الفرق واضح بينهم واسمعه منّي هالمثال
شوف الضبع لا شاف صيده سايس وراوغ وحام
وشوف الصقر لو شاف طير(ن) ماتراجع بالمجال
ما هي من أطباع الصقور تخاوي طيور الحمام
ولاهي من أطباع الرجال تخاوي أنصاف الرجال
منقوووووووول .......
لا هي من أطباع الصقور تخاوي طيور الحمام؟ 
العرض العادي
